ઈટાલીના વડાપ્રધાન જ્યોર્જિયા મેલોનીએ UNGAના 80મા સત્ર પહેલા PM નરેન્દ્ર મોદીના કર્યા ભરપૂર વખાણ. જાણો કેમ તેમણે કહ્યું કે ભારત જ રશિયા-યુક્રેન યુદ્ધ રોકવામાં Global Peacemaker બની શકે છે અને ટ્રમ્પની આશા પર કેવી રીતે પાણી ફરી વળ્યું.
અમેરિકા, ગુરૂવાર
દુનિયાભરના દેશો જ્યારે ગ્લોબલ પ્રોબ્લેમ્સના સોલ્યુશન માટે ભેગા થઈ રહ્યા છે, ત્યારે ઈટાલીના વડાપ્રધાન જ્યોર્જિયા મેલોનીએ એક એવું સ્ટેટમેન્ટ આપ્યું છે જેણે આખી દુનિયાનું ધ્યાન ખેંચ્યું છે. સંયુક્ત રાષ્ટ્ર મહાસમિતિ (UNGA)ના 80મા સત્રની શરૂઆત પહેલાં જ તેમણે ભારતના વડાપ્રધાન નરેન્દ્ર મોદીને વિશ્વના સૌથી પાવરફુલ લીડર ગણાવ્યા છે. મેલોનીનું સ્પષ્ટપણે માનવું છે કે જો કોઈ રશિયા અને યુક્રેન વચ્ચે ચાલી રહેલા ભયંકર યુદ્ધને રોકી શકે છે, તો તે માત્ર નરેન્દ્ર મોદી છે.
એક ન્યૂઝ એજન્સી સાથેની વાતચીતમાં તેમણે કહ્યું, “મને લાગે છે કે ભારત આ મામલે ઘણો મહત્વનો રોલ પ્લે કરી શકે છે.” આ સ્ટેટમેન્ટ એવા સમયે આવ્યું છે જ્યારે દુનિયાના ઘણા ભાગોમાં નાના-મોટા સંઘર્ષો ચાલી રહ્યા છે અને રશિયા-યુક્રેન યુદ્ધનો કોઈ અંત દેખાઈ રહ્યો નથી.
ટ્રમ્પના ‘નોબેલ પ્રાઈઝ’ના સપના પર બ્રેક?
રસપ્રદ વાત એ છે કે મેલોનીનું આ નિવેદન અમેરિકાના રાષ્ટ્રપતિ ડોનાલ્ડ ટ્રમ્પ માટે એક મોટા ઝટકા સમાન છે. ટ્રમ્પ વારંવાર શાંતિ માટે નોબેલ પ્રાઈઝ મેળવવાની ઈચ્છા વ્યક્ત કરતા રહ્યા છે અને દાવો કરે છે કે તેઓ જ યુદ્ધ રોકાવી શકે છે. પરંતુ તેમના તમામ પ્રયત્નો અને દાવાઓ છતાં ન તો યુક્રેન-રશિયા યુદ્ધ અટક્યું છે, ન તો ગાઝામાં ઈઝરાયેલ-હમાસ વચ્ચે શાંતિ સ્થપાઈ છે. એવામાં મેલોની દ્વારા મોદીની પ્રશંસા થવી એ ગ્લોબલ સ્ટેજ પર ભારતના વધતા પ્રભાવને દર્શાવે છે.
મોદી અને મેલોની વચ્ચે મજબૂત પાર્ટનરશિપ
આ મહિનાની શરૂઆતમાં જ PM મોદી અને જ્યોર્જિયા મેલોની વચ્ચે લાંબી ટેલિફોનિક વાતચીત થઈ હતી. આ વાતચીતમાં યુક્રેન યુદ્ધના તાત્કાલિક અને શાંતિપૂર્ણ ઉકેલ માટે ભારત સંપૂર્ણપણે સપોર્ટ કરશે તેવી ખાતરી આપવામાં આવી હતી. આ ઉપરાંત, બંને નેતાઓએ ઈન્વેસ્ટમેન્ટ, ડિફેન્સ, સ્પેસ, ટેકનોલોજી, એજ્યુકેશન અને આતંકવાદ વિરોધી જેવા અનેક મુદ્દાઓ પર દ્વિપક્ષીય ભાગીદારીને વધુ મજબૂત કરવા માટે સહમતિ દર્શાવી હતી.
