ગાંધીનગરની પંજરી એગ્રો પ્રોસેસિંગ એલ.એલ.પી. કંપનીના બે ભાગીદારોએ SBI બેન્ક સાથે 3.42 કરોડની ઠગાઈ કરી. પ્લાન્ટ-મશીનરી વેચી દઈ અને કંપની બંધ કરી દીધી. સમગ્ર મામલે CID ક્રાઈમમાં ફરિયાદ નોંધાઈ છે. જાણો શું છે આખો કેસ.
ગાંધીનગર, બુધવાર
ગાંધીનગર જી.આઈ.ડી.સી. ઇલેક્ટ્રોનિક્સ એસ્ટેટ સ્થિત પંજરી એગ્રો પ્રોસેસિંગ એલ.એલ.પી. નામની કંપનીના બે ભાગીદારોએ સ્ટેટ બેન્ક ઑફ ઇન્ડિયા (SBI) સાથે કુલ 3.42 કરોડની મોટી નાણાકીય છેતરપિંડી આચરી હોવાનો સનસનાટીભર્યો કિસ્સો સામે આવ્યો છે. આ ભાગીદારોએ બેન્કની જાણ બહાર ગીરવે મૂકેલા પ્લાન્ટ અને મશીનરી વેચી મારી કંપનીને તાળું મારી દીધું હતું. આ મામલે SBIના મેનેજરે ગાંધીનગર CID ક્રાઈમમાં ગુનો નોંધાવ્યો છે.
લોન મંજૂર અને રીસ્ટ્રક્ચરિંગ
SBI બેન્કના મેનેજર દિનેશ કુમાર સુથાર દ્વારા નોંધાવેલી ફરિયાદ મુજબ, આ છેતરપિંડીની શરૂઆત ઓક્ટોબર 2020માં થઈ હતી. તે સમયે કંપનીના ભાગીદારો સ્વ.દિલીપભાઈ રામી અને મેહુલ હસમુખભાઈ વાળંદે (રહે. ગોકુલ આવાસ યોજના, જોધપુર, અમદાવાદ) MSME યોજના હેઠળ કુલ 2.80 કરોડની લોન મંજૂર કરાવી હતી, જેમાં 2 કરોડની કેશ ક્રેડિટ અને 80 લાખની ટર્મ લોનનો સમાવેશ થતો હતો. લોન સામે અમરેલી ખાતેની 3 મિલકતો (જમીન/ગોડાઉન) ગીરવે મૂકવામાં આવી હતી.
જોકે, કોરોનાકાળમાં દિલીપભાઈના અવસાન બાદ ચિંતન શાંતિલાલ પરમાર (રહે. નિકોલ) નવા ભાગીદાર બન્યા હતા. ત્યારબાદ સપ્ટેમ્બર 2021માં બેન્કે લોનનું રીસ્ટ્રક્ચરિંગ કર્યું, જેના કારણે ધીરાણની રકમમાં વધારો થયો અને કુલ લોનનો આંકડો મોટો થઈ ગયો.
હપ્તા ચૂકવવાનું બંધ અને NPA જાહેર
ઓક્ટોબર 2022થી આ લોનના હપ્તા ભરવાના શરૂ થતા હતા. પરંતુ બંને ભાગીદારો, મેહુલ વાળંદ અને ચિંતન પરમારે, સમયસર હપ્તા ભરવાનું ટાળ્યું. આથી, બેન્કે તુરંત પગલાં લેતા ડિસેમ્બર 2022ના રોજ તમામ 4 લોન એકાઉન્ટને NPA (નોન-પર્ફોર્મિંગ એસેટ) જાહેર કરી દીધા.
NPA જાહેર થયા બાદ બેન્કના અધિકારીઓએ ધંધાના સ્થળે રૂબરૂ મુલાકાત લીધી ત્યારે કંપનીને તાળું મારેલું જોવા મળ્યું હતું.
ગીરવે મૂકેલી મશીનરી પણ વેચી દીધી
સ્થાનિક પૂછપરછમાં બેન્કને જાણવા મળ્યું કે કંપનીના માલિકોએ માત્ર કંપની બંધ નથી કરી, પરંતુ બેન્કને ગીરવે મૂકેલા પ્લાન્ટ અને મશીનરી પણ બેન્કની જાણ બહાર ગેરકાયદેસર રીતે વેચી મારી છે અથવા સગેવગે કરી દીધી છે.
આમ, મેહુલ વાળંદ અને ચિંતન પરમારે બેન્કને વિશ્વાસમાં લઈ ગીરવે મૂકેલી મિલકતનું ગેરકાયદેસર વેચાણ કરીને 3.42 કરોડની નાણાકીય છેતરપિંડી અને વિશ્વાસઘાત કર્યો હતો. સમગ્ર મામલે હવે ગાંધીનગર CID ક્રાઈમમાં ગુનો નોંધી આગળની કાયદેસરની તપાસ હાથ ધરવામાં આવી છે.
