તમિલનાડુના મંત્રી એમઆરકે પન્નીરસેલ્વમે ઉત્તર ભારતીયો અને હિન્દી ભાષા પર વિવાદાસ્પદ ટિપ્પણી કરી છે. જાણો શું છે સમગ્ર મામલો અને ભાજપે કેવી આપી પ્રતિક્રિયા.
તમિલનાડુ, ગુરૂવાર
તમિલનાડુના રાજકારણમાં ફરી એકવાર ભાષા અને પ્રાંતવાદને લઈને વિવાદ છેડાયો છે. રાજ્યના કૃષિ મંત્રી એમઆરકે પન્નીરસેલ્વમે ઉત્તર ભારતીયો અને હિન્દી ભાષા વિશે આપેલા એક નિવેદને દેશભરમાં રાજકીય ગરમાવો લાવી દીધો છે. ચેંગલપટ્ટુમાં એક કાર્યક્રમ દરમિયાન મંત્રીએ કરેલી ટિપ્પણીને કારણે હવે તેમની આકરી ટીકા થઈ રહી છે.
શું છે મંત્રીનું વિવાદાસ્પદ નિવેદન?
એક પક્ષીય કાર્યક્રમમાં સંબોધન કરતા મંત્રી પન્નીરસેલ્વમે કહ્યું કે, ઉત્તર ભારતથી આવતા લોકો તમિલનાડુમાં આવીને હોટલોમાં ટેબલ સાફ કરે છે અથવા મજૂરીકામ કરે છે. તેમણે વધુમાં ઉમેર્યું કે, આ લોકો માત્ર હિન્દી જાણતા હોવાથી તેમને સારી નોકરીઓ મળતી નથી અને તેઓ અહીં આવીને પાણીપૂરી વેચવા કે કન્સ્ટ્રક્શન સાઈટ પર કામ કરવા મજબૂર બને છે.
ભાષાના આધારે કરી સરખામણી
મંત્રીએ તમિલનાડુ સરકારની શિક્ષણ નીતિના વખાણ કરતા હિન્દી ભાષા પર પ્રહાર કર્યા હતા. તેમણે કહ્યું કે:
તમિલનાડુના બાળકો અંગ્રેજી શીખે છે, તેથી તેઓ અમેરિકા અને લંડન જેવા દેશોમાં જઈને કરોડો રૂપિયા કમાય છે.
હિન્દી ભાષીઓ પાસે અન્ય ભાષાનું જ્ઞાન ન હોવાથી તેમની પ્રગતિ અટકી જાય છે.
રાજ્યની બે-ભાષાની નીતિ (તમિલ અને અંગ્રેજી) આર્થિક રીતે વધુ ફાયદાકારક છે.
ભાજપનો પલટવાર
મંત્રીના આ નિવેદન બાદ ભારતીય જનતા પાર્ટીએ DMK સરકાર પર આકરા પ્રહાર કર્યા છે. તમિલનાડુ ભાજપના પ્રમુખ નૈનાર નાગેન્દ્રને સોશિયલ મીડિયા પ્લેટફોર્મ X પર લખ્યું કે, કોઈપણ કામ નાનું હોતું નથી અને કોઈ નાગરિક ઊતરતી કક્ષાનો હોતો નથી. ભાજપે આક્ષેપ કર્યો છે કે ચૂંટણી નજીક આવતા જ DMK નેતાઓ જાણીજોઈને પ્રવાસી મજૂરોને નિશાન બનાવીને સમાજમાં ભાગલા પાડવાનો પ્રયાસ કરી રહ્યા છે.
ભારત જેવા લોકશાહી દેશમાં જ્યાં દરેક નાગરિકને ગમે ત્યાં જઈને કામ કરવાની સ્વતંત્રતા છે, ત્યાં એક જવાબદાર મંત્રી દ્વારા આવી ટિપ્પણી કરવી કેટલી યોગ્ય છે તે મોટો પ્રશ્ન છે. આ નિવેદનને કારણે ઉત્તર અને દક્ષિણ ભારત વચ્ચે ફરી એકવાર ભાષાકીય અને પ્રાદેશિક વિવાદ વકરવાની શક્યતા છે.
