અમદાવાદના નાના ચીલોડા ગામમાં સ્થાનિકોએ ખરાબ રસ્તા, ઉભરાતી ગટરો અને પાણીની સમસ્યા સામે ઉગ્ર વિરોધ પ્રદર્શન કર્યું. સરદારનગર વોર્ડના કોર્પોરેટરો, ધારાસભ્ય અલ્પેશ ઠાકોર અને પૂર્વ સાંસદ હસમુખ પટેલ ‘ગુમ થયેલા’ હોવાના પોસ્ટરો સાથે જનતાએ પોતાનો આક્રોશ વ્યક્ત કર્યો. જાણો આ આખો મુદ્દો અને સ્થાનિકોની મુશ્કેલીઓ વિશે.
અમદાવાદ, સોમવાર
સામાન્ય રીતે, રાજ્યના ઘણા વિસ્તારોમાં નાગરિકોને પ્રાથમિક સુવિધાઓ જેવી કે રોડ-રસ્તા, ગટર અને પાણીની સમસ્યાઓનો સામનો કરવો પડે છે, ત્યારે આ જ પ્રકારનો એક કિસ્સો અમદાવાદના નાનાચીલોડા ગામમાં સામે આવ્યો છે. અહીં સ્થાનિક રહેવાસીઓએ ખરાબ રસ્તા, ઉભરાતી ગટરો અને પાણીની તીવ્ર અછતને કારણે આક્રોશ સાથે વિરોધ પ્રદર્શન કર્યું છે.
શું છે સમગ્ર મામલો?
આજે એટલે કે 21 સપ્ટેમ્બરના રોજ, નાનાચીલોડાના લોકોએ રોડ પર ઉતરીને સરકાર સામે પોતાનો અવાજ ઉઠાવ્યો. તેમનો મુખ્ય મુદ્દો છેલ્લા 5 વર્ષથી આ વિસ્તારમાં પ્રાથમિક સુવિધાનો અભાવ છે. તેઓનું કહેવું છે કે, ગામમાં રોડની હાલત એટલી ખરાબ છે કે અવર-જવર મુશ્કેલ બની ગઈ છે, જ્યારે બીજી તરફ પાણીની લાઈનો પણ યોગ્ય રીતે કાર્યરત નથી. ગટર લાઈનો ઉભરાવાની સમસ્યા પણ રોજિંદા જીવનનો એક ભાગ બની ગઈ છે.
‘કમળનું ફૂલ અમારી ભૂલ’ અને ‘નેતા સૂતેલા’ જેવા સ્લોગન
આ વિરોધ પ્રદર્શન દરમિયાન સ્થાનિકોએ કેટલાક આકર્ષક અને સ્પષ્ટ પોસ્ટરો પ્રદર્શિત કર્યા હતા. આ પોસ્ટરો પર ‘કમળનું ફૂલ અમારી ભૂલ’, ‘ભારતીય જૂઠા પાર્ટી’ અને ‘રસ્તા તૂટેલા નેતા સૂતેલા’ જેવા સ્લોગન લખેલા હતા, જે સીધો જ સત્તા પક્ષ પર પ્રહાર કરી રહ્યા હતા. આ પ્રદર્શનમાં લોકોનો રોષ સ્પષ્ટ દેખાઈ રહ્યો હતો.
‘ગુમ થયેલા’ રાજનેતાઓ સામે આક્રોશ
વિરોધનું સૌથી અનોખું પાસું એ હતું કે સ્થાનિકોએ સરદારનગર વોર્ડના ચારેય ભાજપ કોર્પોરેટરો, ગાંધીનગર દક્ષિણ વિધાનસભાના MLA અલ્પેશ ઠાકોર અને પૂર્વ લોકસભાના MP હસમુખ પટેલના ફોટા સાથે ‘ગુમ થયેલ છે’ (Missing)ના પોસ્ટરો લગાવ્યા હતા. આ પોસ્ટરો દ્વારા તેઓએ જનપ્રતિનિધિઓની બેદરકારી અને સમસ્યાઓ પ્રત્યેના ઉદાસીન વલણ સામે આક્રોશ વ્યક્ત કર્યો હતો. આ ઘટના એ વાતનો સંકેત છે કે જો જનપ્રતિનિધિઓ પોતાના મતવિસ્તારની સમસ્યાઓ પર ધ્યાન નહીં આપે, તો જનતાનો આક્રોશ આ રીતે સામે આવી શકે છે.
આ ઘટના દર્શાવે છે કે નાનાચીલોડાના નાગરિકો હવે માત્ર ફરિયાદો કરવાને બદલે પ્રત્યક્ષ કાર્યવાહી કરીને સત્તાધીશોનું ધ્યાન દોરવા માંગે છે. હવે જોવાનું એ રહેશે કે આ વિરોધ પ્રદર્શન બાદ તંત્ર અને જનપ્રતિનિધિઓ આ સમસ્યાઓના નિવારણ માટે કેવા પગલાં ભરે છે.
