અમદાવાદમાં 77મા પ્રજાસત્તાક પર્વની શાનદાર ઉજવણી! DyCM હર્ષ સંઘવીએ ધ્વજારોહણ કરી મેટ્રો ટ્રેનના ઉપયોગ અને સ્વચ્છતા જાળવવા પર ભાર મૂક્યો.
અમદાવાદ, સોમવાર
દેશભરમાં જ્યારે રાષ્ટ્રભક્તિનો માહોલ છવાયેલો છે, ત્યારે અમદાવાદ જિલ્લામાં પણ 77મા પ્રજાસત્તાક પર્વ (Republic Day 2026) ની આતશબાજી સાથે શાનદાર ઉજવણી કરવામાં આવી હતી. આ ખાસ પ્રસંગે અમદાવાદ જિલ્લા પોલીસ હેડક્વાર્ટર ખાતે રાજ્યના નાયબ મુખ્યમંત્રી (DyCM) હર્ષ સંઘવીની ઉપસ્થિતિમાં મુખ્ય કાર્યક્રમ યોજાયો હતો.
પોલીસ પરેડ અને ધ્વજવંદનથી ગુંજ્યું ગ્રાઉન્ડ
કાર્યક્રમની શરૂઆત નાયબ મુખ્યમંત્રી હર્ષ સંઘવીના હસ્તે ધ્વજારોહણ સાથે થઈ હતી. તિરંગાને સલામી આપ્યા બાદ પોલીસ જવાનો દ્વારા શિસ્તબદ્ધ પરેડ અને માર્ચ પાસ્ટનું પ્રદર્શન કરવામાં આવ્યું હતું. પોલીસ બેન્ડની સુરાવલીઓ અને જવાનોના કદમતાલથી વાતાવરણ દેશભક્તિના રંગે રંગાઈ ગયું હતું.
સાયબર ફ્રોડ અને ડ્રગ્સ વિરુદ્ધ જાગૃતિનો સંદેશ
આ વર્ષની ઉજવણીમાં માત્ર પરેડ જ નહીં, પરંતુ સામાજિક જાગૃતિ લાવતા વિવિધ ટેબ્લો (ઝાંખીઓ) પણ આકર્ષણનું કેન્દ્ર બન્યા હતા. ખાસ કરીને હાલના સમયમાં વધતા જતા સાયબર ક્રાઈમ અને યુવાધનને બરબાદ કરતા ડ્રગ્સ સામે લડવા માટે જાગૃતિ ફેલાવતા ટેબ્લો રજૂ કરવામાં આવ્યા હતા. આ ટેબ્લોના માધ્યમથી લોકોને સાયબર ફ્રોડથી કેવી રીતે બચવું અને નશામુક્ત સમાજ કેવી રીતે બનાવવો તેની સચોટ માહિતી આપવામાં આવી હતી.
“મેટ્રો ટ્રેનનો મહત્તમ ઉપયોગ કરો” – હર્ષ સંઘવી
જાહેર જનતાને સંબોધન કરતા DyCM હર્ષ સંઘવીએ ટ્રાફિક સમસ્યાના ઉકેલ અને ઝડપી મુસાફરી માટે મેટ્રો ટ્રેનનો ઉપયોગ કરવા ખાસ અપીલ કરી હતી. તેમણે જણાવ્યું હતું કે, “હવે અમદાવાદથી ગાંધીનગર સુધી મેટ્રો કનેક્ટિવિટી ઉપલબ્ધ છે, જેનાથી મુસાફરી ખુબ જ સરળ અને ઝડપી બની છે. નાગરિકોએ મેટ્રો ટ્રેન સેવાનો વધુમાં વધુ લાભ લેવો જોઈએ.” આ ઉપરાંત, તેમણે મેટ્રો સ્પોર્ટ્સ કોમ્પ્લેક્સનો પણ યોગ્ય ઉપયોગ કરવા માટે યુવાનોને પ્રોત્સાહિત કર્યા હતા.
જાહેર સંપત્તિની જાળવણી અને સ્વચ્છતાની શીખ
પોતાના સંબોધનના અંતે હર્ષ સંઘવીએ એક જવાબદાર નાગરિક તરીકેની ફરજો યાદ અપાવી હતી. તેમણે સ્વચ્છતા અને જાહેર મિલકતની જાળવણી અંગે લાલબત્તી ધરતા કહ્યું હતું કે, “સરકારી સેવાઓ કે જાહેર મિલકતોનો ઉપયોગ કરવાની સાથે તેની જાળવણી કરવી પણ આપણી જ જવાબદારી છે. આપણે મેટ્રો કે અન્ય સુવિધાઓનો ઉપયોગ તો કરીએ છીએ, પણ તેને સ્વચ્છ રાખવી પણ એટલી જ જરૂરી છે.”
તેમણે લોકોને અપીલ કરતા કહ્યું કે, “ઉપયોગ સાથે જાળવણી પણ કરો, તમારી આસપાસ સ્વચ્છતા રાખો અને અન્ય કોઈ વ્યક્તિ ગંદકી ન કરે તે પણ સુનિશ્ચિત કરો.” આમ, પ્રજાસત્તાક પર્વની આ ઉજવણી રાષ્ટ્રપ્રેમની સાથે નાગરિક ધર્મ નિભાવવાના સંકલ્પ સાથે સંપન્ન થઈ હતી.
