ઝાપોરિઝ્ઝ્યા ન્યૂક્લિયર પ્લાન્ટ પર ડ્રોન હુમલાથી દુનિયા પર પરમાણુ સંકટનો ખતરો. રશિયાએ યુક્રેન પર લગાવ્યો આરોપ, જ્યારે યુક્રેને કર્યો સદંતર ઇનકાર. જાણો આખી ઘટના.
નવી દિલ્હી, રવિવાર
દુનિયા પર ફરી એકવાર પરમાણુ દુર્ઘટનાનો ભય મંડરાઈ રહ્યો છે. યુરોપના સૌથી મોટા અને ચર્ચિત ઝાપોરિઝ્ઝ્યા (Zaporizhzhia) ન્યૂક્લિયર પાવર પ્લાન્ટ પર ફરીથી સંકટના વાદળો ઘેરાયા છે. તાજેતરમાં જ આ પ્લાન્ટ પર ડ્રોન હુમલો થયો હોવાના લેટેસ્ટ અહેવાલો સામે આવ્યા છે, જેના કારણે રશિયા અને યુક્રેન વચ્ચેનો તણાવ ચરમસીમાએ પહોંચી ગયો છે.
પાવર યુનિટ નંબર 6 ની ટર્બાઇન હોલની ઇમારત પર ભયંકર હુમલો. રશિયાનો દાવો યુક્રેને કામિકાઝે ડ્રોનથી જાણીજોઈને પરમાણુ પ્લાન્ટને નિશાન બનાવ્યો. યુક્રેનનો જવાબ આ માત્ર રશિયાનો પ્રોપેગન્ડા છે, ત્યાં અમારી કોઈ સક્રિય લડાઈ ચાલુ નથી.
શું છે સમગ્ર ઘટના અને રશિયાનો આરોપ?
રશિયાની સરકારી ન્યૂક્લિયર કંપની રોસાટોમ એ ગંભીર દાવો કર્યો છે કે શનિવારે બપોરે યુક્રેનના એક કામિકાઝે ડ્રોને ઝાપોરિઝ્ઝ્યા પ્લાન્ટ પર હુમલો કર્યો હતો. રોસાટોમના વડા એલેક્સી લિખાચેવે માહિતી આપતા જણાવ્યું કે, આ ડ્રોન સીધું પાવર યુનિટ નંબર 6 ની ટર્બાઇન હોલની બિલ્ડિંગ પર ત્રાટક્યું હતું, જેના કારણે ત્યાં જોરદાર વિસ્ફોટ થયો હતો. રશિયાનો સ્પષ્ટ આરોપ છે કે આ હુમલો ઈરાદાપૂર્વક કરવામાં આવ્યો હતો. જોકે, આખી દુનિયા માટે રાહતની વાત એ છે કે આ હુમલામાં પ્લાન્ટના મુખ્ય પરમાણુ સાધનો સુરક્ષિત છે. પરંતુ વિસ્ફોટ એટલો શક્તિશાળી હતો કે ટર્બાઇન હોલની દીવાલમાં એક મોટું કાણું પડી ગયું છે.
યુક્રેને દાવાને ફગાવ્યો, આપ્યો જડબાતોડ જવાબ
બીજી તરફ, યુક્રેનની સેનાએ રશિયાના આ તમામ આરોપોને પાયાવિહોણા ગણાવીને સદંતર ફગાવી દીધા છે. યુક્રેનનું કહેવું છે કે આ માત્ર ને માત્ર રશિયાનો ખોટો પ્રોપેગન્ડા છે. યુક્રેનિયન સૈન્યએ સ્પષ્ટતા કરી છે કે તેઓ આંતરરાષ્ટ્રીય માનવીય કાયદાઓનું ચુસ્તપણે પાલન કરે છે. પરમાણુ સુવિધાઓ પર હુમલો કરવાથી કેવા વિનાશક પરિણામો આવી શકે છે, તેનાથી તેઓ સારી રીતે વાકેફ છે. વધુમાં, યુક્રેને જણાવ્યું છે કે રશિયા જે વિસ્તારમાં હુમલાની વાત કરી રહ્યું છે, ત્યાં હાલમાં કોઈ પણ પ્રકારની સક્રિય લડાઈ ચાલી રહી નથી કે કોઈ હથિયારોનો ઉપયોગ પણ કરવામાં આવ્યો નથી.
દુનિયા માટે ખતરાની ઘંટડી કેમ?
તમને જણાવી દઈએ કે, માર્ચ 2022થી ઝાપોરિઝ્ઝ્યા ન્યૂક્લિયર પ્લાન્ટ પર રશિયાએ કબજો જમાવી રાખ્યો છે. આ પ્લાન્ટ યુદ્ધના મુખ્ય મોરચાની એકદમ નજીક આવેલો હોવાથી તે હંમેશા અતિસંવેદનશીલ રહ્યો છે. છેલ્લા ચાર વર્ષથી ચાલી રહેલા આ ભીષણ યુદ્ધમાં આ પ્લાન્ટ પર અવારનવાર હુમલા થતા રહ્યા છે.
નિષ્ણાતોના મતે, જો આ પ્લાન્ટના મુખ્ય રિએક્ટરને સહેજ પણ નુકસાન પહોંચે, તો રેડિયેશન લીક થવાનો મોટો ખતરો છે. આ પરિસ્થિતિ માત્ર યુક્રેન કે રશિયા પૂરતી સીમિત નહીં રહે, પરંતુ સમગ્ર યુરોપ અને વિશ્વ માટે એક ભયાનક પરમાણુ દુર્ઘટના સર્જી શકે છે. આ જ કારણ છે કે આંતરરાષ્ટ્રીય સમુદાય આ ઘટના પર ચાંપતી નજર રાખી રહ્યો છે.
