વસ્તી ગણતરી માટે ગુજરાતમાં 1.20 લાખ શિક્ષકો તૈયાર, પણ શૈક્ષિક મહાસંઘે સરકાર સામે મૂકી આકરી શરતો. અન્ય 26 કેડરના કર્મચારીઓને પણ કામગીરીમાં જોડવા અને શિક્ષકોને સુરક્ષા આપવા કરી રજૂઆત.
ગાંધીનગર, રવિવાર
દેશભરમાં જ્યારે વસ્તી ગણતરીની તૈયારીઓ ચાલી રહી છે, ત્યારે ગુજરાતમાં આ કામગીરીનો મોટો ભાગ શિક્ષકોના શિરે રહેવાનો છે. આગામી સમયમાં વસ્તી ગણતરીની કામગીરીમાં રાજ્યના અંદાજે 1.20 લાખ જેટલા શિક્ષકો જોડાશે. જોકે, આ રાષ્ટ્રીય કામગીરી દરમિયાન શિક્ષકોને કોઈ મુશ્કેલી ન પડે તે માટે ‘અખિલ ભારતીય રાષ્ટ્રીય શૈક્ષિક મહાસંઘ – ગુજરાત’ દ્વારા સરકાર સમક્ષ મહત્વની રજૂઆતો કરવામાં આવી છે.
શિક્ષકોને પડતી મુશ્કેલીઓ બાબતે ચિંતા
વસ્તી ગણતરી હોય કે પછી SIR જેવી કામગીરી, આ બધું સમયસર પૂરું કરવું જરૂરી હોય છે. પરંતુ આ દરમિયાન ગ્રાઉન્ડ લેવલ પર શિક્ષકોને અનેક વ્યવહારિક તકલીફોનો સામનો કરવો પડતો હોય છે. આ અંગે વાત કરતા મહાસંઘના મહામંત્રી પરેશ પટેલે જણાવ્યું હતું કે, શિક્ષકોને કામગીરી દરમિયાન કોઈ પણ પ્રકારની તકલીફ ન પડવી જોઈએ. તેમણે કહ્યું કે, ભૂતકાળમાં શિક્ષકોને પડેલી મુશ્કેલીઓની સમીક્ષા કરવામાં આવી છે અને તેના આધારે સરકારને કેટલાક નક્કર સૂચનો આપવામાં આવ્યા છે જેથી ભવિષ્યમાં કામગીરી સરળ બને.
મહાસંઘની સરકાર પાસે મુખ્ય માંગણીઓ
શૈક્ષિક મહાસંઘે માત્ર રજૂઆત નથી કરી, પરંતુ શિક્ષકોના હિતમાં કેટલીક સ્પષ્ટ માગણીઓ પણ મૂકી છે, જે નીચે મુજબ છે:
કામગીરી દરમિયાન સુરક્ષા: સૌથી મહત્વની વાત એ છે કે જ્યારે શિક્ષકો વસ્તી ગણતરીની કામગીરીમાં વ્યસ્ત હોય, ત્યારે તેમની સામે કોઈ પણ પ્રકારની ધરપકડ, વોરંટ કે નોટિસ જારી કરવામાં ન આવે. આ પ્રકારની કાયદાકીય કાર્યવાહીથી શિક્ષકો ડર મુક્ત થઈને કામ કરી શકે તે માટે આ સુરક્ષા કવચની માંગ કરવામાં આવી છે.
સહાયકની ફાળવણી: વસ્તી ગણતરીનું કામ ઘણું મોટું અને જટિલ હોય છે. તેથી કામગીરી સરળ અને ઝડપી બને તે માટે દરેક ટીમ સાથે એક સહાયક (Assistant) આપવામાં આવે તેવી રજૂઆત પણ કરવામાં આવી છે.
ભારણ ઘટાડવા અન્ય કર્મચારીઓનો સમાવેશ: માત્ર શિક્ષકો પર જ બધો બોજ નાખવાને બદલે, રાજ્ય સરકારના અન્ય 26 જેટલા અલગ-અલગ કેડરના કર્મચારીઓને પણ વસ્તી ગણતરીની કામગીરીમાં જોડવામાં આવે. જેથી કામનું ભારણ વહેંચાઈ જાય અને શિક્ષણ કાર્ય પર પણ તેની ઓછી અસર પડે.
આમ, અખિલ ભારતીય રાષ્ટ્રીય શૈક્ષિક મહાસંઘે સ્પષ્ટ કર્યું છે કે શિક્ષકો રાષ્ટ્રના કામ માટે તૈયાર છે, પરંતુ તંત્રએ તેમની વ્યવહારિક મુશ્કેલીઓ અને આત્મસન્માનનું ધ્યાન રાખવું પણ એટલું જ જરૂરી છે. હવે જોવાનું એ રહે છે કે સરકાર આ રજૂઆતો પર શું નિર્ણય લે છે.
