રાજ્યના વનકર્મીઓએ પાટનગર ગાંધીનગરમાં આંદોલન શરૂ કર્યું છે. વનકર્મીઓ ડેરા-તંબુ તાણીને વિરોધ પ્રદર્શન કરી રહ્યા છે.
પોતાના પડતર હકો અને વિવિધ માંગણીઓના ઉકેલ માટે રાજ્યના વનકર્મીઓએ પાટનગર ગાંધીનગરમાં આંદોલન શરૂ કર્યું છે. વનકર્મીઓ ડેરા-તંબુ તાણીને વિરોધ પ્રદર્શન કરી રહ્યા છે. આજે આ આંદોલન પાંચમા દિવસે પણ યથાવત્ રહ્યું છે.
આંદોલનકારી કર્મચારીઓએ સ્પષ્ટ કર્યું છે કે જ્યાં સુધી તેમની માંગણીઓનો કાયમી અને સંતોષકારક ઉકેલ નહીં આવે ત્યાં સુધી તેઓ ગાંધીનગર છોડશે નહીં.
વનકર્મીઓની મુખ્ય ત્રણ માંગણીઓ
જંગલોની સુરક્ષા અને સંરક્ષણની જવાબદારી નિભાવતા વનકર્મીઓ પોતાની વિવિધ માંગણીઓ સાથે સરકાર સામે વિરોધ નોંધાવી રહ્યા છે. તેમની મુખ્ય માંગણીઓમાં નીચેની બાબતોનો સમાવેશ થાય છે.
- ભથ્થું: કર્મચારીઓને યોગ્ય ભથ્થું ચૂકવવામાં આવે.
- રજા પગાર: રજા પગારની ગણતરી વ્યવસ્થિત રીતે કરવામાં આવે.
- 48 દિવસની મર્યાદા: 48 દિવસની મર્યાદા દૂર કરીને પૂરા દિવસોનો પગાર ચૂકવવામાં આવે.
આ માંગણીઓના ઉકેલ માટે વનકર્મીઓ છેલ્લા પાંચ દિવસથી સામૂહિક રજા પર ઉતર્યા છે. કર્મચારીઓએ સરકાર સામે પોતાની લડત ચાલુ રાખવાનો નિર્ધાર વ્યક્ત કર્યો છે.
દિવાળી પહેલાં સરકાર સાથે બેઠકની શક્યતા
વનકર્મીઓના આંદોલનને પગલે વહીવટી તંત્ર પણ સક્રિય થયું છે. દિવાળીના તહેવારો નજીક હોવાથી સરકાર અને આંદોલનકારી કર્મચારીઓ વચ્ચે ચર્ચા થવાની શક્યતા વ્યક્ત કરવામાં આવી રહી છે.
મળતી માહિતી મુજબ, રાજ્ય સરકાર આજે વનકર્મીઓ સાથે બેઠક માટે આમંત્રણ મોકલી શકે છે. જોકે, બેઠક અંગે સત્તાવાર પુષ્ટિ સામે આવી નથી.હવે સરકાર સાથેની સંભવિત વાટાઘાટોમાં કોઈ ઉકેલ આવે છે કે નહીં તેના પર વનકર્મીઓની નજર છે. બીજી તરફ, કર્મચારીઓએ માંગણીઓ સંતોષાય ત્યાં સુધી આંદોલન ચાલુ રાખવાની ચીમકી આપી છે.
