યુએસ ફેડરલ એવિએશન એડમિનિસ્ટ્રેશન (FAA) એ સંચાર વ્યવસ્થામાં ખામી સર્જાતા દેશભરના એરપોર્ટ પર ફ્લાઇટ્સના ટેકઓફ પર અસ્થાયી પ્રતિબંધ મૂક્યો હતો.
અમેરિકામાં શુક્રવારે હવાઈ મુસાફરી પર મોટી અસર જોવા મળી હતી. યુએસ ફેડરલ એવિએશન એડમિનિસ્ટ્રેશન (FAA) એ સંચાર વ્યવસ્થામાં ખામી સર્જાતા દેશભરના એરપોર્ટ પર ફ્લાઇટ્સના ટેકઓફ પર અસ્થાયી પ્રતિબંધ મૂક્યો હતો. આ નિર્ણયથી હજારો મુસાફરો એરપોર્ટ પર અટવાઈ ગયા હતા. જોકે, લગભગ ચારથી પાંચ કલાક બાદ FAAએ ગ્રાઉન્ડ સ્ટોપ હટાવી લીધો હતો.
એર ટ્રાફિક કંટ્રોલની સંચાર વ્યવસ્થામાં ખામી
FAAના જણાવ્યા અનુસાર, દેશભરના અનેક એર રૂટ ટ્રાફિક કંટ્રોલ સેન્ટરોમાં સંચાર સંબંધિત સમસ્યા સર્જાઈ હતી. હવાઈ ટ્રાફિકનું સંચાલન કરતી વ્યવસ્થામાં ખામીના કારણે સુરક્ષાને ધ્યાનમાં રાખીને તમામ અમેરિકન એરપોર્ટ પરથી ફ્લાઇટ્સના પ્રસ્થાન પર રોક લગાવવામાં આવી હતી.
પરિવહન મંત્રી સીન ડફીએ જણાવ્યું હતું કે FAAની ટેકનિકલ ટીમો સમસ્યાની તપાસ કરી રહી છે. અધિકારીઓએ સ્પષ્ટ કર્યું હતું કે હવામાં રહેલી ફ્લાઇટ્સ સુરક્ષિત રીતે પોતાના ગંતવ્ય સુધી પહોંચી શકે તે માટે વ્યવસ્થા કરવામાં આવી રહી છે.
હજારો ફ્લાઇટ્સ રદ, મુસાફરો પરેશાન
આ અચાનક નિર્ણયથી અમેરિકાના મુખ્ય એરપોર્ટ પર ભારે અવ્યવસ્થા સર્જાઈ હતી. ફ્લાઇટ ટ્રેકિંગના આંકડા મુજબ, લગભગ 5,000 ફ્લાઇટ્સ રદ થઈ હતી. જ્યારે હજારો ફ્લાઇટ્સ મોડી પડી હતી.
અનેક મુસાફરોને લાંબા સમય સુધી એરપોર્ટ પર રાહ જોવી પડી હતી. કેટલીક ફ્લાઇટ્સને અન્ય એરપોર્ટ તરફ વાળવામાં આવી હતી. એરલાઇન્સે પણ મુસાફરોને ફ્લાઇટના નવા સમય અને સ્થિતિ અંગે માહિતી મેળવવા સૂચના આપી હતી.
FAAએ પ્રતિબંધ હટાવ્યો, કામગીરી ધીમે ધીમે શરૂ
લગભગ ચારથી પાંચ કલાક સુધી ચાલેલા ગ્રાઉન્ડ સ્ટોપ બાદ FAAએ પ્રતિબંધ હટાવવાની જાહેરાત કરી હતી. જોકે, ફ્લાઇટ્સનું સમયપત્રક સામાન્ય થવામાં સમય લાગવાની શક્યતા વ્યક્ત કરવામાં આવી હતી.અમેરિકાના અધિકારીઓએ જણાવ્યું હતું કે આ ઘટના પાછળ ટેલિકોમ્યુનિકેશનની ખામી જવાબદાર હતી. પ્રાથમિક તપાસમાં કોઈ દુશ્મનાવટભર્યા હુમલા અથવા સાયબર એટેકના સંકેત મળ્યા નહોતા. હવાઈ ટ્રાફિકની જૂની સંચાર વ્યવસ્થાની વિશ્વસનીયતા અંગે પણ ફરી ચર્ચા શરૂ થઈ છે.
