ગુજરાતના નાયબ મુખ્યમંત્રી હર્ષ સંઘવીએ માતા-પિતાને વૃદ્ધાશ્રમમાં મોકલી દેતા સંતાનો સામે કડક સામાજિક વલણ અપનાવવાની અપીલ કરી છે
ગુજરાતના નાયબ મુખ્યમંત્રી હર્ષ સંઘવીએ માતા-પિતાને વૃદ્ધાશ્રમમાં મોકલી દેતા સંતાનો સામે કડક સામાજિક વલણ અપનાવવાની અપીલ કરી છે. તેમણે પાટીદાર સમાજના આગેવાનોને જણાવ્યું કે આવા સંતાનોને સમાજના મંચ પર સ્થાન ન આપવું જોઈએ.
સમાજના ટ્રસ્ટમાં આવા સંતાનોનું દાન ન સ્વીકારવાની અપીલ
હર્ષ સંઘવીએ પોતાના સંબોધનમાં જણાવ્યું કે માતા-પિતા સંતાનોના ભવિષ્ય માટે જીવનભર મહેનત કરે છે. તેઓ પોતાના બાળકોનાં સપનાં સાકાર કરવા અનેક મુશ્કેલીઓનો સામનો કરે છે. પરંતુ સંતાનો સફળ થયા પછી માતા-પિતાને સાથે રાખવામાં સંકોચ અનુભવે છે, તે ચિંતાજનક છે.
તેમણે સમાજના આગેવાનોને અપીલ કરી કે જો કોઈ સંતાન માતા-પિતાને વૃદ્ધાશ્રમમાં મોકલતું હોય, તો આવા લોકોનું સમાજના ટ્રસ્ટમાં દાન સ્વીકારવું નહીં.
સામાજિક કાર્યક્રમોમાં પણ સ્થાન ન આપવા સૂચન
નાયબ મુખ્યમંત્રીએ વધુમાં કહ્યું કે માતા-પિતાની સંભાળ ન રાખતા સંતાનોને સમાજના જાહેર મંચ પર સ્થાન ન આપવું જોઈએ. આવા લોકોને સામાજિક પ્રસંગોમાં આમંત્રણ આપવા અંગે પણ સમાજે વિચારવું જોઈએ.તેમણે સંયુક્ત કુટુંબ વ્યવસ્થાને જાળવવાની જવાબદારી સમાજના આગેવાનો અને ટ્રસ્ટીઓની હોવાનું જણાવ્યું. સાથે જ વૃદ્ધ માતા-પિતાને પરિવાર સાથે રાખવા માટે સામૂહિક પ્રયાસો કરવાની જરૂરિયાત પર ભાર મૂક્યો.
હર્ષ સંઘવીની આ અપીલનો મુખ્ય ઉદ્દેશ વૃદ્ધ માતા-પિતાનું સન્માન જાળવવા અને પરિવારની જવાબદારી પ્રત્યે સંતાનોમાં જાગૃતિ લાવવાનો છે.
