મુખ્ય આરોપી સૌરભ ચંદ્રાકરને ઓમાનથી ભારત લાવી પૂછપરછ કર્યા બાદ તપાસ એજન્સીએ ગુજરાત સહિત છ રાજ્યોમાં 33 સ્થળે દરોડા પાડ્યા છે.
કરોડો રૂપિયાના મહાદેવ ઓનલાઇન બેટિંગ એપ કેસમાં CBIએ મોટી કાર્યવાહી હાથ ધરી છે. મુખ્ય આરોપી સૌરભ ચંદ્રાકરને ઓમાનથી ભારત લાવી પૂછપરછ કર્યા બાદ તપાસ એજન્સીએ ગુજરાત સહિત છ રાજ્યોમાં 33 સ્થળે દરોડા પાડ્યા છે. ગુજરાતમાં અમદાવાદ, વડોદરા અને સુરતનો સમાવેશ થાય છે. દરોડા દરમિયાન અનેક સટ્ટાબાજીની પેનલનો પર્દાફાશ થયો છે.
સૌરભ ચંદ્રાકરની પૂછપરછ બાદ દરોડા
મહાદેવ ઓનલાઇન બુક એપના પ્રમોટર અને મુખ્ય આરોપીઓમાંના એક સૌરભ ચંદ્રાકરને 1 નવેમ્બર 2026ના રોજ ઓમાનથી ભારત લાવવામાં આવ્યો હતો. ત્યારબાદ CBIએ તેની ધરપકડ કરીને પૂછપરછ હાથ ધરી હતી.
પૂછપરછ દરમિયાન મળેલી માહિતીના આધારે તપાસ એજન્સીએ પેનલ ઓપરેટરો સાથે જોડાયેલા સ્થળોએ દરોડા પાડ્યા હતા. ચંદ્રાકરની પૂછપરછમાં બેટિંગ એપનું નેટવર્ક કેવી રીતે ચાલતું હતું અને ભારતમાં તેના ઓપરેટરો કેવી રીતે કામ કરતા હતા તેની વિગતો સામે આવી હોવાનું CBIએ જણાવ્યું છે.
અમદાવાદ, વડોદરા અને સુરતમાં પણ તપાસ
CBIએ ગુજરાત ઉપરાંત પંજાબ, દિલ્હી, રાજસ્થાન, મધ્યપ્રદેશ, છત્તીસગઢ અને મહારાષ્ટ્રનાં વિવિધ શહેરોમાં કાર્યવાહી કરી હતી. દરોડા પાડવામાં આવેલા શહેરોમાં અમદાવાદ, વડોદરા, સુરત, અમૃતસર, દિલ્હી, નાગૌર, ધોલપુર, ભોપાલ, રાયપુર, દુર્ગ, ઇન્દોર, મુંબઈ અને નાગપુરનો સમાવેશ થાય છે.
આ કાર્યવાહી દરમિયાન અનેક સ્થળોએ ઓનલાઇન સટ્ટાબાજી અને જુગારની પેનલ કાર્યરત હોવાનું મળી આવ્યું હતું. CBIએ આવી પેનલો બંધ કરાવી દીધી છે.
ડિજિટલ પુરાવા અને હવાલા નેટવર્કની વિગતો મળી
દરોડા દરમિયાન તપાસ એજન્સીએ મોબાઇલ ફોન, ડિજિટલ ઉપકરણો અને શંકાસ્પદ દસ્તાવેજો જપ્ત કર્યા છે. આ સામગ્રીમાંથી અન્ય લોકોના નામે ખોલવામાં આવેલા અથવા ભાડે લેવાયેલા બેંક ખાતાઓનો ઉપયોગ થતો હોવાના પુરાવા મળ્યા હોવાનું જણાવાયું છે.
CBIની તપાસ મુજબ, પેનલ ઓપરેટરો ગ્રાહકોના આઈડી સંભાળતા અને સટ્ટાની રકમ અન્ય લોકોના નામે રહેલા બેંક ખાતાઓમાં જમા કરાવતા હતા. ત્યારબાદ નફાની રકમ હવાલા મારફતે વિદેશ મોકલવામાં આવતી હોવાની આશંકા છે.
તપાસનો વ્યાપ વધવાની શક્યતા
આ કેસમાં CBI અન્ય આરોપીઓ, વિદેશમાં રહેલા સંચાલકો, નાણાકીય વ્યવહારોમાં મદદ કરનારા લોકો અને કથિત રીતે સંડોવાયેલા સરકારી કર્મચારીઓની ભૂમિકાની તપાસ કરી રહી છે. ફરાર આરોપીઓને ભારત લાવવા માટે પણ કાર્યવાહી ચાલુ હોવાનું એજન્સીએ જણાવ્યું છે.
ઓનલાઇન સટ્ટાબાજી માટે પોતાનું બેંક ખાતું, સિમ કાર્ડ અથવા ઓળખના દસ્તાવેજો અન્યને આપવાથી કાનૂની મુશ્કેલી ઊભી થઈ શકે છે. CBIએ લોકોને આવી પ્રવૃત્તિઓથી દૂર રહેવાની ચેતવણી પણ આપી છે.
