ગુજરાતના જંગલોમાંથી મોટા સમાચાર! દાહોદના રતનમહાલ બાદ હવે છોટા ઉદેપુરના જંગલ વિસ્તારમાં વાઘના પગના નિશાન જોવા મળ્યા છે. વન વિભાગે આ વાતની પુષ્ટિ કરી છે અને મોનીટરિંગ શરૂ કર્યું છે. જાણો સંપૂર્ણ વિગત.
છોટાઉદેપુર, રવિવાર
ગુજરાતના વન્યજીવન માટે વધુ એક રોમાંચક સમાચાર સામે આવ્યા છે. દાયકાઓ બાદ ગુજરાતની ધરતી પર વાઘના પુનરાગમનની પુષ્ટિ થઈ હતી, જે બાદ હવે દાહોદના રતનમહાલ અભ્યારણ્ય પછી છોટા ઉદેપુરના જંગલ વિસ્તારમાં પણ વાઘની હાજરીના પુરાવા મળ્યા છે. વન વિભાગના કર્મચારીઓને પેટ્રોલિંગ દરમિયાન જમીન પર વાઘના પગના સ્પષ્ટ નિશાન જોવા મળતા સમગ્ર વિસ્તારમાં ઉત્સાહનો માહોલ છે.
છોટા ઉદેપુરમાં વાઘની હાજરીની પુષ્ટિ
છોટા ઉદેપુરના વન વિભાગના અધિકારીઓએ જણાવ્યું કે, નિયમિત પેટ્રોલિંગ દરમિયાન ટીમને વાઘના પંજાના નિશાન દેખાયા હતા. આ નિશાનની તપાસ કરતા તે વાઘના હોવાનું સ્પષ્ટ થયું છે. ઉલ્લેખનીય છે કે છોટા ઉદેપુરનો જંગલ વિસ્તાર દાહોદના રતનમહાલ અભ્યારણ્યની નજીક આવેલો છે. આથી, એવી પ્રબળ શક્યતા છે કે જે વાઘ રતનમહાલમાં જોવા મળ્યો હતો, તે જ વાઘ ખોરાક અને પાણીની શોધમાં આ વિસ્તારમાં ફરતો હોઈ શકે છે.
વન વિભાગ સતર્ક, સ્થાનિકોને સાવચેત કરાયા
વાઘના પગલાં મળ્યાની ઘટના બાદ વન વિભાગ તરત જ એક્શનમાં આવી ગયું છે. વાઘની ગતિવિધિઓ પર નજર રાખવા માટે જંગલમાં મોનીટરિંગ વધારી દેવામાં આવ્યું છે અને અલગ-અલગ જગ્યાએ કેમેરા ટ્રેપ ગોઠવવાની પણ તૈયારી ચાલી રહી છે. આ સાથે જ, જંગલની આસપાસના ગામડાઓમાં રહેતા સ્થાનિક લોકોને સાવચેત રહેવા અને રાત્રિના સમયે એકલા અવરજવર ન કરવા માટે સૂચના આપવામાં આવી છે.
રતનમહાલમાં કેમેરામાં કેદ થયો હતો વાઘ
થોડા સમય પહેલાં જ દાહોદ જિલ્લાના રતનમહાલ અભ્યારણ્યમાં એક નર વાઘ કેમેરા ટ્રેપમાં કેદ થયો હતો. વન વિભાગ દ્વારા પ્રાણીઓ માટે બનાવવામાં આવેલા એક ‘બાથ ટબ’માં તે આરામ કરતો જોવા મળ્યો હતો. આ ઘટનાએ વર્ષો બાદ ગુજરાતમાં વાઘની હાજરીના સત્તાવાર પુરાવા આપ્યા હતા. હવે છોટા ઉદેપુરમાં તેના પગના નિશાન મળતા એ સ્પષ્ટ થઈ રહ્યું છે કે વાઘ આ વિસ્તારને પોતાનું ઘર બનાવી રહ્યો છે, જે ગુજરાતના વન્યજીવન સંરક્ષણ માટે એક મોટી સફળતા માનવામાં આવી રહી છે.
