બાંગ્લાદેશમાં ચૂંટણી પહેલાં ફરી એકવાર હિન્દુઓ નિશાન પર. મૈમનસિંહમાં 62 વર્ષીય હિન્દુ વેપારીની ઘાતકી હત્યા કરી લાખોની લૂંટ. જાણો શું છે સમગ્ર ઘટના અને મૃતકના પુત્રનો આક્ષેપ.
બાંગ્લાદેશ, બુધવાર
બાંગ્લાદેશમાં લઘુમતી હિન્દુઓ પર અત્યાચારનો સિલસિલો અટકવાનું નામ નથી લઈ રહ્યો. હત્યા, લૂંટ અને મારપીટ જેવી ઘટનાઓ ત્યાં જાણે સામાન્ય બની ગઈ હોય તેવી સ્થિતિ છે. દેશમાં આગામી 12 ફેબ્રુઆરીએ ચૂંટણી યોજાવાની છે, પરંતુ તે પહેલાં જ મૈમનસિંહ જિલ્લામાં એક કાળજું કંપાવી દેતી ઘટના સામે આવી છે. અહીં હથિયારધારી તત્ત્વોએ એક હિન્દુ વેપારીની દુકાનમાં ઘૂસીને તેમની ઘાતકી હત્યા કરી નાખી છે.
દુકાનમાં ઘૂસીને આચર્યું ક્રૂર કૃત્ય
આ ઘટના મૈમનસિંહ જિલ્લાના ત્રિશાલ તાલુકાની છે. પ્રાપ્ત માહિતી અનુસાર, 12 ફેબ્રુઆરીએ યોજાનારી ચૂંટણીના માત્ર 48 કલાક પહેલાં જ આ હત્યાકાંડ સર્જાયો છે. ત્રિશાલ તાલુકાના બોગર માર્કેટમાં અચાનક કેટલાક હથિયારધારી શખ્સો હોબાળો મચાવતા આવ્યા હતા. આ દરમિયાન તેઓ ચોખાના વેપારીની દુકાનમાં ઘૂસી ગયા હતા.
હુમલાખોરોએ ક્રૂરતાની તમામ હદો વટાવીને દુકાનદાર પર ધારદાર હથિયારો વડે હુમલો કર્યો હતો. એટલું જ નહીં, વેપારીને ગંભીર રીતે ઘાયલ કર્યા બાદ હુમલાખોરો દુકાનનું શટર બહારથી બંધ કરીને ત્યાંથી નાસી છૂટ્યા હતા. મૃતકની ઓળખ 62 વર્ષીય સુશેન ચંદ્ર સરકાર તરીકે થઈ છે.
પુત્રની વેદના: “અમારે કોઈની સાથે દુશ્મની નહોતી”
મૃતક વેપારી સુશેન ચંદ્ર સરકારના પુત્ર સુજાન સરકારે પોતાની આપવીતી જણાવતા કહ્યું હતું કે, બદમાશો ભાગી ગયા પછી પરિવારજનો તાત્કાલિક દુકાને દોડી ગયા હતા. ત્યાં જઈને જોયું તો તેમના પિતા લોહીના ખાબોચિયામાં પડેલા હતા. પરિવારજનો તેમને તાત્કાલિક સારવાર માટે હોસ્પિટલ લઈ ગયા હતા, પરંતુ હોસ્પિટલ પહોંચે તે પહેલાં જ તેમનું મોત નીપજ્યું હતું.
સુજાન સરકારે આક્ષેપ કર્યો છે કે, હુમલાખોરો દુકાનમાંથી લાખોનું બાંગ્લાદેશી ચલણ લૂંટી ગયા છે. તેમણે ભારે હૈયે કહ્યું કે, “અમારે કોઈ પણ વ્યક્તિ સાથે અંગત દુશ્મની નથી, અમે શાંતિથી ચોખાનો વેપાર કરીએ છીએ. છતાં મારા પિતાની આ રીતે ક્રૂરતાપૂર્વક હત્યા કરવામાં આવી. હત્યારાઓને કડકમાં કડક સજા મળવી જોઈએ.”
પોલીસે શું કહ્યું?
ઘટનાની જાણ થતાં જ પોલીસ કાફલો ઘટનાસ્થળે દોડી આવ્યો હતો. પોલીસના જણાવ્યા અનુસાર, રાત્રે લગભગ 11:00 વાગ્યાના સુમારે હથિયારધારી બદમાશો દુકાનમાં ઘૂસ્યા હતા અને સુશેન સરકારની હત્યા કર્યા બાદ દુકાનનું શટર બંધ કરી દીધું હતું. જ્યારે પરિવારજનો શોધખોળ કરતા આવ્યા ત્યારે સમગ્ર ઘટના પ્રકાશમાં આવી હતી. પોલીસે આ મામલે ગુનો નોંધીને આગળની કાર્યવાહી હાથ ધરી છે.
યુનુસ સરકારના શાસનમાં હિન્દુઓ અસુરક્ષિત?
ઉલ્લેખનીય છે કે, બાંગ્લાદેશમાં મુહમ્મદ યુનુસની અંતરિમ સરકાર સત્તા પર આવી ત્યારથી હિન્દુઓ અને અન્ય લઘુમતીઓ વિરુદ્ધ હિંસાના બનાવોમાં ચિંતાજનક વધારો થયો છે. ચૂંટણી નજીક છે ત્યારે પણ હિંસામાં કોઈ ઘટાડો જોવા મળ્યો નથી. આ પ્રકારની ઘટનાઓને કારણે વિશ્વભરના માનવાધિકાર સંગઠનો અને લોકોમાં ભારે રોષ જોવા મળી રહ્યો છે.
