સોનાના ભાવમાં ઘટાડા વચ્ચે ચીને કરી રેકોર્ડબ્રેક ખરીદી. શું 4887 ડોલર પર પહોંચેલું સોનું ફરી ઉછળશે? જાણો ચીનની કેન્દ્રીય બેન્કના આંકડા અને બજારની ચાલ વિશે વિગતે.
નવી દિલ્હી, રવિવાર
છેલ્લા થોડા સમયથી સોના-ચાંદીના બજારમાં જબરદસ્ત ઉથલપાથલ જોવા મળી રહી છે. એક તરફ સામાન્ય ગ્રાહકો માટે સોનાના ભાવમાં ઘટાડો જોવા મળ્યો છે, તો બીજી તરફ પડદા પાછળ એક મોટી રમત રમાઈ રહી છે. દુનિયાના સૌથી મોટા અર્થતંત્રમાંના એક એવા ચીને સોનાની ખરીદીમાં ગજબની તેજી બતાવી છે.
આર્થિક અનિશ્ચિતતાના આ માહોલમાં ચીનનું આ પગલું રોકાણકારોને વિચારતા કરી મૂકે તેવું છે. ચાલો સમજીએ કે બજારમાં શું ચાલી રહ્યું છે અને આવનારા દિવસોમાં સોનાના ભાવ કઈ દિશામાં જઈ શકે છે.
ચીન સતત ભરી રહ્યું છે સોનાનો સ્ટોક
વૈશ્વિક સ્તરે જ્યારે તણાવ વધી રહ્યો છે અને આર્થિક જોખમો તોળાઈ રહ્યા છે, ત્યારે ચીન સુરક્ષિત રોકાણ તરફ વળ્યું છે. ચીનની મધ્યસ્થ બેન્ક પીપલ્સ બેન્ક ઓફ ચાઈનાએ ચોંકાવનારો ખુલાસો કર્યો છે. બેન્કના જણાવ્યા મુજબ, તેઓ સતત છેલ્લા 15 મહિનાથી સોનાના ભંડારમાં વધારો કરી રહ્યા છે.
તાજેતરમાં જાહેર થયેલા જાન્યુઆરી મહિનાના આંકડા મુજબ જાન્યુઆરીના અંત સુધીમાં ચીન પાસે કુલ સોનાનો જથ્થો 74.19 મિલિયન ફાઈન ટ્રોય ઔંસ થઈ ગયો છે. ડિસેમ્બર મહિનામાં આ આંકડો 74.15 મિલિયન ફાઈન ટ્રોય ઔંસ હતો. માત્ર જથ્થો જ નહીં, પણ વેલ્યુએશનની દ્રષ્ટિએ પણ મોટો ઉછાળો આવ્યો છે. ચીન પાસે હવે 369.58 અરબ ડોલર ની કિંમતનું સોનું પડ્યું છે, જે ગયા મહિને 319.45 અરબ ડોલર હતું.
શું સોનાના ભાવ ફરી રોકેટ ગતિએ વધશે?
ચીન જે રીતે આક્રમક રીતે સોનું ખરીદી રહ્યું છે, તે જોઈને બજારના નિષ્ણાતો માની રહ્યા છે કે આવનારા દિવસોમાં સોનાના ભાવમાં ફરી રેકોર્ડબ્રેક તેજી આવી શકે છે. જ્યારે કોઈ મોટો દેશ આટલા મોટા પાયે સોનું સંગ્રહ કરે, ત્યારે તેની સીધી અસર આંતરરાષ્ટ્રીય બજાર પર પડતી હોય છે.
ભાવમાં ઘટાડો અને અમેરિકન કનેક્શન
જાન્યુઆરી મહિનામાં સોનાએ ઐતિહાસિક સપાટી ક્રોસ કરી હતી. ભાવ 5600 ડોલર પ્રતિ ઔંસ સુધી પહોંચી ગયા હતા. જોકે, આ તેજી લાંબો સમય ટકી નહીં. બજારમાં અચાનક આવેલા કડાકાનું કારણ અમેરિકા છે. અમેરિકન ફેડરલ રિઝર્વના અધ્યક્ષ તરીકે કેવિન વાર્શનું નામ ચર્ચામાં આવતાની સાથે જ સેન્ટિમેન્ટ બદલાઈ ગયું હતું. આ સમાચારને કારણે સોનાના ભાવમાં સીધો 800 ડોલર નો કડાકો બોલ્યો છે. હાલમાં આંતરરાષ્ટ્રીય બજારમાં સોનાનો ભાવ ઘટીને 4887 ડોલર પ્રતિ ઔંસ આસપાસ ચાલી રહ્યો છે.
એક વિચિત્ર વિરોધાભાસ
અહીં એક રસપ્રદ બાબત એ જોવા મળી છે કે ચીન સરકાર સોનું ખરીદી રહી છે, પરંતુ ત્યાંની પ્રજા સોનાથી દૂર ભાગી રહી છે. એક તરફ સેન્ટ્રલ બેન્ક તિજોરી ભરી રહી છે. બીજી તરફ ચીનના રિટેલ બજારમાં ગ્રાહકોની ખરીદી ઘટી છે. ચાઈના ગોલ્ડ એસોસિએશનના ડેટા મુજબ, વર્ષ 2025 માં ચીનમાં સોનાનો કુલ વપરાશ 3.75% ઘટીને 950 મેટ્રિક ટન રહ્યો છે.
હાલ સોનામાં રોકાણ કરતા પહેલા આંતરરાષ્ટ્રીય પ્રવાહો અને ખાસ કરીને ચીનની ચાલ પર નજર રાખવી જરુરી છે. ભાવ હાલ ઘટ્યા છે, પણ મોટા ખેલાડીઓની ખરીદી ભવિષ્યમાં મોટી તેજીનો સંકેત આપી શકે છે.
