દહેગામના બારિયા ગામે મધુર ડેરીના વિવાદને લઈ પશુપાલકોમાં ભારે રોષ જોવા મળ્યો છે. ભાજપના ધારાસભ્યનો કાફલો રોકી પશુપાલકોએ ‘દૂધ નહીં તો વોટ નહીં’ ના નારા લગાવ્યા હતા.
દહેગામ, શુક્રવાર
ગાંધીનગરના દહેગામ તાલુકામાં ઉત્તમ ડેરી અને મધુર ડેરી વચ્ચે ચાલી રહેલો સંઘર્ષ હવે વહીવટી મર્યાદાઓ ઓળંગીને રાજકીય મેદાનમાં આવી ગયો છે. છેલ્લા ઘણા સમયથી ચાલી રહેલા આ વિવાદને કારણે પશુપાલકોની હાલત કફોડી બની છે. જેની સીધી અસર હવે આગામી સમયમાં યોજાનારી ચૂંટણીઓ પર પડતી દેખાઈ રહી છે. ખાસ કરીને ગ્રામીણ વિસ્તારોમાં પશુપાલકોનો ગુસ્સો સાતમા આસમાને પહોંચ્યો છે.
બંને ડેરીઓના વિવાદમાં પશુપાલકો પિસાયા
અમદાવાદ જિલ્લા ડેરી સંઘની ઉત્તમ ડેરી અને ગાંધીનગર જિલ્લાની મધુર ડેરી વચ્ચે લાંબા સમયથી કાનૂની અને વહીવટી ખેંચતાણ ચાલી રહી છે. આ ગજગ્રાહમાં સામાન્ય પશુપાલકો આર્થિક રીતે પાયમાલ થઈ રહ્યા છે. પશુપાલકોનો આક્ષેપ છે કે તંત્રના આંતરિક વિખવાદને કારણે તેમના દૂધના નિકાલ માટે કોઈ યોગ્ય વ્યવસ્થા કરવામાં આવતી નથી. આ આક્રોશના પરિણામે હવે પશુપાલકોએ “મધુર ડેરીમાં દૂધ નહીં તો વોટ નહીં” નું અભિયાન શરૂ કર્યું છે.
બારિયા ગામે ધારાસભ્યનો ઘેરાવ
આ વિવાદની ગંભીરતા ત્યારે સામે આવી જ્યારે 15 એપ્રિલે દહેગામના ધારાસભ્ય બલરાજસિંહ પોતાના સમર્થકો અને ભાજપના કાર્યકરો સાથે બારિયા ગામે ચૂંટણી પ્રચાર માટે પહોંચ્યા હતા. ગામમાં પ્રવેશતા જ પશુપાલકોએ હાથમાં બેનરો સાથે ધારાસભ્યના કાફલાને અટકાવ્યો હતો. ગ્રામજનોની અપેક્ષા હતી કે લોકપ્રતિનિધિ તેમની વેદના સાંભળે અને આ ડેરી વિવાદનો કોઈ કાયમી ઉકેલ લાવવા ખાતરી આપે. જોકે સ્થાનિકોના જણાવ્યા અનુસાર, ધારાસભ્ય પશુપાલકોની વાત સાંભળવાને બદલે ત્યાંથી પોતાની ગાડી હંકારીને નીકળી ગયા હતા.
ભાજપના કાર્યકરોને પશુપાલકોએ ઘેર્યા
ધારાસભ્યના આ વર્તનથી પશુપાલકોમાં રોષ બેવડાયો હતો. ધારાસભ્ય તો નીકળી ગયા પણ પાછળ રહી ગયેલા ભાજપના અન્ય આગેવાનો અને કાર્યકરોને ગ્રામજનોએ ઘેરી લીધા હતા. લાંબા સમય સુધી ચાલેલા આ ઘેરાવ દરમિયાન પશુપાલકોએ સ્પષ્ટ શબ્દોમાં ચેતવણી આપી હતી કે જો મધુર ડેરીના પ્રશ્નો જલ્દી નહીં ઉકેલાય તો સત્તાધારી પક્ષે મતોનું મોટું નુકસાન વેઠવું પડશે.
રાજકીય ગણિત બગડી શકે છે
સ્થાનિક રાજકીય વિશ્લેષકોનું માનવું છે કે આ વિવાદ માત્ર સહકારી ક્ષેત્ર પૂરતો મર્યાદિત નથી રહ્યો. પશુપાલકોનો આ આક્રોશ ભાજપ માટે આગામી ચૂંટણીમાં કપરા ચઢાણ સાબિત થઈ શકે છે. જો વહેલી તકે ઉત્તમ અને મધુર ડેરી વચ્ચેનો વહીવટી પેચ ઉકેલવામાં નહીં આવે, તો દૂધની આ લડાઈ શાસક પક્ષ માટે ચૂંટણીના પરિણામોમાં ઘણી કડવી સાબિત થઈ શકે છે.
દહેગામના પશુપાલકો અત્યારે આર્થિક ભીંસમાં છે અને તેમનો આ ગુસ્સો હવે રાજકીય વિરોધમાં ફેરવાઈ રહ્યો છે. લોકશાહીમાં જ્યારે જનતાના પાયાના પ્રશ્નો વણઉકલ્યા રહે છે, ત્યારે તેની અસર મતદાન પર પડવી સ્વાભાવિક છે. હવે જોવાનું એ રહેશે કે સરકાર અને ડેરી પ્રશાસન આ મામલે ક્યારે જાગે છે.
