અમદાવાદના સાયન્સ સિટી રોડ પર આવેલી એમ્પાયર સ્કાયવ્યૂ સોસાયટી બહાર દિવાળીની રાત્રે ફટાકડા ફોડવા જેવી સામાન્ય બાબતે મોટો વિવાદ સર્જાયો હતો.
અમદાવાદના સાયન્સ સિટી રોડ પર આવેલી એમ્પાયર સ્કાયવ્યૂ સોસાયટી બહાર દિવાળીની રાત્રે ફટાકડા ફોડવા જેવી સામાન્ય બાબતે મોટો વિવાદ સર્જાયો હતો. શરૂઆતમાં થયેલી બોલાચાલીએ જોતજોતામાં હિંસક સ્વરૂપ ધારણ કર્યું હતું. આશરે 20થી 25 લોકોનું ટોળું લાકડીઓ અને દંડા સાથે સોસાયટીમાં ઘૂસી આવ્યું હોવાનો આરોપ છે. પરિસ્થિતિ વણસતાં સોસાયટીના એક સભ્યએ પોતાની લાઇસન્સવાળી પિસ્તોલથી હવામાં બે-ત્રણ રાઉન્ડ ફાયરિંગ કર્યું હતું.
ફટાકડા સોસાયટીના સભ્યો પર પડતાં વિવાદ શરૂ થયો
મળતી માહિતી મુજબ, દિવાળીની રાત્રે કેટલાક યુવકો સોસાયટીની બહાર ફટાકડા ફોડી રહ્યા હતા. આ દરમિયાન ફટાકડા સોસાયટીના સભ્યો પર પડતાં જિગર પટેલે યુવકોને આવું ન કરવા જણાવ્યું હતું.
આ બાબતે બંને પક્ષો વચ્ચે બોલાચાલી શરૂ થઈ હતી. જોકે, મામલો શાંત થવાને બદલે વધુ ઉગ્ર બન્યો હતો.
20થી 25 લોકોનું ટોળું લાકડીઓ અને દંડા સાથે પહોંચ્યું
વિવાદ વધતાં ફટાકડા ફોડી રહેલા યુવકોએ પોતાના અન્ય સાથીઓને પણ સ્થળ પર બોલાવી લીધા હતા. થોડી જ વારમાં આશરે 20થી 25 લોકોનું ટોળું લાકડીઓ, દંડા અને અન્ય હથિયારો સાથે સોસાયટીમાં પહોંચ્યું હતું.
આ ટોળાએ સોસાયટી પરિસરમાં ઘૂસીને તોડફોડ કરી હોવાનો આરોપ છે. ઉપરાંત, ત્યાં હાજર લોકો પર લાકડીઓ અને દંડા વડે હુમલો કરવામાં આવ્યો હોવાની વિગતો પણ સામે આવી છે.
સ્વબચાવમાં લાઇસન્સવાળી પિસ્તોલથી ફાયરિંગ
હુમલા દરમિયાન પરિસ્થિતિ વધુ વણસતાં સોસાયટીના સભ્ય રાકેશ પટેલે પોતાની લાઇસન્સવાળી પિસ્તોલથી હવામાં બે-ત્રણ રાઉન્ડ ફાયરિંગ કર્યું હતું. તેમના જણાવ્યા મુજબ, તેમણે પોતાના અને સોસાયટીના અન્ય લોકોના બચાવ માટે ફાયરિંગ કર્યું હતું.
ગોળીબારનો અવાજ સાંભળતાં જ ટોળાના લોકો સ્થળ પરથી ભાગી ગયા હતા. જોકે, પોલીસે ફાયરિંગની ઘટનાના કાયદાકીય પાસાંની પણ તપાસ હાથ ધરી છે.
પોલીસે આરોપીઓ સામે કાર્યવાહી હાથ ધરી
આ હિંસક અથડામણના મામલે પોલીસે તપાસ શરૂ કરી હતી. અગાઉના અહેવાલો મુજબ, પોલીસે આરોપીઓની ધરપકડ કરી હતી અને ઘટનાનું રિકન્સ્ટ્રક્શન પણ કરાવ્યું હતું. આ રિકન્સ્ટ્રક્શનના વીડિયો સોશિયલ મીડિયા પર વાયરલ થયા હતા
