કેન્સરના દર્દીઓ અને તેમના પરિવારજનો માટે રાહતના સમાચાર સામે આવ્યા છે. કેન્દ્ર સરકારે કેન્સરની સારવારમાં ઉપયોગમાં લેવાતી 137 દવાઓ પર ટ્રેડ માર્જિન નક્કી કર્યું છે.
કેન્સરના દર્દીઓ અને તેમના પરિવારજનો માટે રાહતના સમાચાર સામે આવ્યા છે. કેન્દ્ર સરકારે કેન્સરની સારવારમાં ઉપયોગમાં લેવાતી 137 દવાઓ પર ટ્રેડ માર્જિન નક્કી કર્યું છે. આ નિર્ણયને પગલે અનેક દવાઓના ભાવમાં મોટો ઘટાડો થયો છે. રસાયણ અને ખાતર મંત્રાલયના ઔષધ વિભાગના જણાવ્યા અનુસાર, દવાઓના સુધારેલા ભાવ 9 નવેમ્બરથી અમલી બનશે.
સરકારના આ નિર્ણયથી દર્દીઓને દવાઓની ખરીદીમાં મોટી આર્થિક રાહત મળશે. અંદાજ મુજબ, ગ્રાહકોને દર વર્ષે આશરે ₹3,502.31 કરોડની બચત થવાની શક્યતા છે.
NPPAએ 137 કેન્સર દવાઓ પર ટ્રેડ માર્જિન નક્કી કર્યું
રસાયણ અને ખાતર મંત્રાલયના નિવેદન પ્રમાણે, રાષ્ટ્રીય ઔષધ મૂલ્ય નિર્ધારણ પ્રાધિકરણ (NPPA) દ્વારા કેન્સરની સારવારમાં વપરાતી 137 દવાઓ પર ટ્રેડ માર્જિન નક્કી કરવામાં આવ્યું છે.
સ્વાસ્થ્ય સેવા મહાનિર્દેશાલય (DGHS) હેઠળ રચાયેલી નિષ્ણાત સમિતિએ 17 ઓક્ટોબરે આ અંગે ભલામણ કરી હતી. ત્યારબાદ NPPA દ્વારા આ નિર્ણય લેવામાં આવ્યો છે.
ટ્રેડ માર્જિન નક્કી થવાથી દવાઓના વેચાણ ભાવ પર નિયંત્રણ આવશે. પરિણામે દર્દીઓને અગાઉ કરતાં ઓછી કિંમતે દવાઓ મળી શકશે.
600 બ્રાન્ડની દવાઓના ભાવમાં 50 ટકાથી વધુ ઘટાડો
મંત્રાલયના જણાવ્યા અનુસાર, અત્યાર સુધીમાં 76 ફાર્માસ્યુટિકલ કંપનીઓએ 121 દવાઓના 1,225 ફોર્મ્યુલેશન માટે નવા મહત્તમ છૂટક ભાવ (MRP) રજૂ કર્યા છે.
આ પૈકી 1,031 ફોર્મ્યુલેશનના ભાવમાં ઘટાડો નોંધાયો છે. ખાસ વાત એ છે કે લગભગ 600 બ્રાન્ડની દવાઓના ભાવમાં 50 ટકાથી વધુનો ઘટાડો થયો છે.
કેટલાક ફોર્મ્યુલેશનમાં ભાવઘટાડો 96.45 ટકા સુધી પહોંચ્યો છે. આથી કેન્સરની સારવાર કરાવતા દર્દીઓના દવાઓ પાછળના ખર્ચમાં નોંધપાત્ર ઘટાડો થવાની આશા છે.
દર્દીઓને દર વર્ષે ₹3,502 કરોડની બચતનો અંદાજ
કેન્સરની સારવાર લાંબી અને ખર્ચાળ હોય છે. તેમાં દવાઓનો ખર્ચ દર્દીઓ અને પરિવારજનો માટે મોટો આર્થિક બોજ બને છે. આવી સ્થિતિમાં સરકારના આ નિર્ણયથી હજારો દર્દીઓને રાહત મળી શકે છે.
મંત્રાલયના અંદાજ પ્રમાણે, આ ભાવઘટાડાથી ગ્રાહકોને દર વર્ષે આશરે ₹3,502.31 કરોડની બચત થશે. જોકે, TMR હેઠળની કિંમત મર્યાદા ભારતમાં સંબંધિત દવાની 10થી 15 ઓળખાયેલી બ્રાન્ડ ઉપલબ્ધ થયા બાદ લાગુ થવાની જોગવાઈ પણ જણાવવામાં આવી છે.
