વાઘોડિયા રોડ પર રહેતા ઇન્ટરનેટ સર્વિસ પ્રોવાઇડર (ISP) વેપારીને ઓનલાઈન પ્રોડક્ટ્સનું રેટિંગ આપીને નફો કમાવવાની લાલચ આપવામાં આવી હતી. આ રીતે ઠગોએ વેપારી પાસેથી રૂ. 1.07 કરોડથી વધુની રકમ પડાવી લીધી હોવાનો આક્ષેપ છે.
શહેરમાં સાયબર ઠગો દ્વારા છેતરપિંડીની વધુ એક મોટી ઘટના સામે આવી છે. વાઘોડિયા રોડ પર રહેતા ઇન્ટરનેટ સર્વિસ પ્રોવાઇડર (ISP) વેપારીને ઓનલાઈન પ્રોડક્ટ્સનું રેટિંગ આપીને નફો કમાવવાની લાલચ આપવામાં આવી હતી. આ રીતે ઠગોએ વેપારી પાસેથી રૂ. 1.07 કરોડથી વધુની રકમ પડાવી લીધી હોવાનો આક્ષેપ છે.
આ કૌભાંડમાં આરોપીઓએ દુબઈની કંપની હોવાની ઓળખ આપી હતી. ત્યારબાદ એક વેબસાઈટ મારફતે વેપારીને રોકાણની લાલચ આપી વિશ્વાસમાં લીધો હતો.
વિદેશી વોટ્સએપ નંબર પરથી વેપારીનો સંપર્ક
મળતી માહિતી મુજબ, વાઘોડિયા રોડની માનવ મંદિર સોસાયટીમાં રહેતા 56 વર્ષીય કમલેશકુમાર ભીખુભાઈ પટેલ ‘ડિજિટલ ટીમ નેટવર્ક’ નામે ઇન્ટરનેટ સર્વિસ પ્રોવાઇડરનો વ્યવસાય કરે છે.4 સપ્ટેમ્બર, 2026ના રોજ તેમણે ‘Ourshopeglobal.com’ વેબસાઈટના કસ્ટમર સર્વિસનો સંપર્ક કર્યો હતો. આ દરમિયાન વિદેશી વોટ્સએપ નંબર પરથી તેમની સાથે વાતચીત શરૂ કરવામાં આવી હતી.
ઠગોએ પોતાની કંપની દુબઈની હોવાનું જણાવ્યું હતું. ઉપરાંત, કંપનીના પ્લેટફોર્મ પર રોકાણ કરવાથી મોટું વળતર મળશે તેવી લાલચ આપી હતી. આ રીતે વેપારીને ઓનલાઈન કમાણીની જાળમાં ફસાવવામાં આવ્યા હતા.
શરૂઆતમાં રૂ. 37 હજારનું વળતર આપ્યું
વેપારીનો વિશ્વાસ જીતવા માટે ઠગોએ વેબસાઈટ પર ડેમો એકાઉન્ટ બનાવી આપ્યું હતું. ત્યારબાદ વોલેટમાં નાણાં જમા કરાવી અલગ-અલગ પ્રોડક્ટ્સના ઓર્ડર બુક કરીને રેટિંગ આપવાનું કામ સોંપ્યું હતું.
શરૂઆતમાં આરોપીઓએ વેપારીના બેંક ખાતામાં રૂ. 37,038નું વળતર જમા કરાવ્યું હતું. આ રકમ સરળતાથી ઉપાડી શકાતાં વેપારીને પ્લેટફોર્મ પર વિશ્વાસ બેઠો હતો.
વોલેટમાં રૂ. 1.64 કરોડનું બેલેન્સ બતાવ્યું
આરોપીઓએ વિશ્વાસનો લાભ લઈને અલગ-અલગ બહાનાં હેઠળ વેપારી પાસેથી તબક્કાવાર કુલ રૂ. 1,07,16,061 જમા કરાવ્યા હતા. બીજી તરફ, વેબસાઈટના વોલેટમાં રૂ. 1,64,35,475નું બેલેન્સ અને નફો દર્શાવવામાં આવતો હતો.
જોકે, વેપારીએ આ રકમ ઉપાડવાનો પ્રયાસ કર્યો ત્યારે કસ્ટમર કેર તરફથી ટેક્સ સહિતનાં અલગ-અલગ બહાનાં આપવામાં આવ્યાં હતાં. વધુ નાણાંની માંગણી થતાં વેપારીને પોતાની સાથે છેતરપિંડી થઈ હોવાની જાણ થઈ હતી.
સાયબર હેલ્પલાઈન 1930 પર ફરિયાદ
છેતરપિંડીની જાણ થતાં વેપારીએ તાત્કાલિક સાયબર હેલ્પલાઈન નંબર 1930 પર સંપર્ક કરીને ફરિયાદ નોંધાવી હતી. આ ઘટનાએ ફરી એકવાર ઓનલાઈન રેટિંગ અને રોકાણના નામે ચાલતી છેતરપિંડી સામે સાવચેત રહેવાની જરૂરિયાત ઊભી કરી છે.ઓનલાઈન પ્લેટફોર્મ પર શરૂઆતમાં નાનું વળતર મળે તો પણ અજાણ્યા લોકોની વાતોમાં આવીને મોટી રકમનું રોકાણ કરવું જોખમી બની શકે છે.
