અમદાવાદના ક્લોથ માર્કેટમાં સનસનાટી! મુંબઈના બે વેપારીઓએ 4.15 કરોડનો કાપડનો સ્ટોક લઈને માત્ર 25 લાખ ચૂકવ્યા અને 3.90 કરોડની છેતરપિંડી આચરી. જાણો આ મોડસ ઓપરેન્ડી અને અન્ય વેપારીઓ સાથે થયેલા ફ્રોડની આશંકા વિશે ડિટેઇલમાં.
અમદાવાદ, રવિવાર
શહેરના પ્રતિષ્ઠિત ઘંટાકર્ણ મહાવીર ક્લોથ માર્કેટમાં મોટા ફ્રોડની ઘટના સામે આવતા વેપારી આલમમાં ચકચાર મચી ગઈ છે. મુંબઈના બે ગઠિયા વેપારીઓએ અમદાવાદના એક કાપડ વેપારી પાસેથી 4.15 કરોડની કિંમતનો કાપડનો જથ્થો ખરીદીને માત્ર 25 લાખનું પેમેન્ટ કર્યું અને બાકીના 3.90 કરોડની રકમ ન ચૂકવીને ચીટિંગ કર્યું હતું. આ અંગેની ફરિયાદ બાદ આર્થિક ગુના નિવારણ શાખા (EOW)ની ન્યુ ક્લોથ માર્કેટ વિંગે તપાસ શરૂ કરી છે.
વિશ્વાસ કેળવીને બિગ ડીલ
પાલડીમાં રહેતા અને ઘંટાકર્ણ મહાવીર ક્લોથ માર્કેટમાં બિઝનેસ કરતા પ્રમીતભાઈ શાહ સાથે લગભગ દોઢ વર્ષ પહેલા મુંબઈના અંધેરીમાં રહેતા ક્રિષ્ણા ઓમ ગુપ્તાએ કોન્ટેક્ટ કર્યો હતો. ક્રિષ્ણા ગુપ્તાએ થોડો સમય નાના ટ્રાન્ઝેક્શન કરીને પ્રમીતભાઈનો ટ્રસ્ટ જીત્યો.
લગભગ છ મહિના પછી ક્રિષ્ણા ગુપ્તાએ પ્રમીતભાઈનો પરિચય તેના ‘મોટા વેપારી’ અજય રસ્તોગી સાથે કરાવ્યો. અજય રસ્તોગી બિગ ડીલર હોવાનું જણાવીને તેણે પ્રમીતભાઈનો વિશ્વાસ કેળવ્યો, જેના કારણે પ્રમીતભાઈએ તેમની સાથે મોટા પાયે ધંધો કરવાનું નક્કી કર્યું.
20 દિવસનો વાયદો, કાપડ સસ્તામાં વેચી માર્યું
વિશ્વાસ કેળવ્યા બાદ અજય રસ્તોગી અને ક્રિષ્ણા ગુપ્તાએ અલગ-અલગ સમયે પ્રમીતભાઈ પાસેથી કુલ 4.15 કરોડની કિંમતનો કાપડનો સ્ટોક ખરીદ્યો હતો. આ ટ્રાન્ઝેક્શન વખતે તેમણે 20 દિવસમાં આખું પેમેન્ટ ચૂકવી દેવાની ખાતરી આપી હતી. જોકે, તેમણે કુલ રકમમાંથી માત્ર 25 લાખ જ ચૂકવ્યા અને બાકીના બેલેન્સ અમાઉન્ટ 3.90 કરોડ ચૂકવ્યા નહીં.
પ્રમીતભાઈએ ફોલો-અપ કરતા અને પોતાની રીતે તપાસ કરતા જાણવા મળ્યું કે આ બંને ગઠિયાઓએ ખરીદેલું કાપડ બારોબાર સસ્તા ભાવે અન્ય જગ્યાએ વેચી દીધું હતું. વધુ તપાસમાં એ પણ સામે આવ્યું છે કે આ બંનેની મોડસ ઓપરેન્ડી (કાર્ય કરવાની પદ્ધતિ) ચોક્કસ છે અને તેમણે અન્ય વેપારીઓ સાથે પણ કરોડો રૂપિયાની છેતરપિંડી આચરી હોવાની આશંકા છે.
